Чешкиот милијардер Даниел Кржетински одлучи да го продаде својот удел од приближно 20 проценти во германската компанија за челик „Тисенкруп Стил Јуроп“ (ТКСЕ), што беше потврдено со денешното заедничко соопштение на двете компании.
Тој претходно планираше да го зголеми својот удел на 50 проценти и да основа заедничко вложување со германски партнер. Сепак, преговорите за создавање германско-чешки гигант за челик и енергија не напредуваа од минатогодишното купување на удел, објави Ројтерс.
Фабриката за челик ТКСЕ долго време се сметаше за нестабилен бизнис што матичната компанија сака да го продаде. Одлуката на Кржетински го отвора патот за германскиот производител поинтензивно да преговара со индискиот „Џиндал“, што може да го забрза евентуалниот премин на сопственост.
Европската индустрија за челик се соочува со зголемена неизвесност. Високите цени на енергијата, конкуренцијата од увозот на евтин челик од Кина и одложувањата во декарбонизацијата на производството го отежнуваат постојаниот раст на секторот.
Искуствата на некои производители на челик во Германија покажуваат дека еколошката трансформација на индустријата на одржлив начин е скапа и комплексна, што дополнително влијае на одлуките на инвеститорите.
„Форбс“ го проценува богатството на Даниел Кржетински на околу 9,4 милијарди евра. Тој е основач и мнозински сопственик на „Енерџи енд индустри холдинг“ (EPH), најголемата енергетска група во Централна Европа, која управува со средства во вредност од околу 28,9 милијарди евра.
Неговото богатство доаѓа и од стратешки инвестиции во различни сектори, вклучувајќи енергетика, малопродажба, медиуми и спорт, објавуваат медиумите.
© Vecer.mk, правата за текстот се на редакцијата
