Новиот надбискуп од Кантербери, Сара Мулали, денес изјави дека нејзиното назначување претставува „огромна одговорност“, но дека ќе пристапи кон улогата со мир и доверба во Бога.
„Додека одговарам на Христовиот повик за оваа нова служба, го правам тоа во истиот дух на служење на Бога и на другите што ме мотивираше уште од кога првпат влегов во верата како тинејџерка“, рече Малали, објави Ројтерс. Таа истакна дека преку својата кариера како медицинска сестра и нејзината христијанска служба, научила внимателно да ги слуша луѓето и Божјите поттици со цел да ги собере луѓето заедно и да им обезбеди надеж и исцелување.
Британскиот премиер Кир Стармер го поддржа назначувањето на Малали за прва жена на надбискупот од Кантербери.
„Англиканската црква е од големо значење за оваа земја. Надбискупот од Кантербери ќе игра клучна улога во нашиот национален живот. Ѝ посакувам секаков успех и се радувам на соработката“, рече Стармер.
Според Би-Би-Си, една од претходните улоги на Малали, пред да биде назначена за надбискуп на Кантербери, била да претседава со телото кое одлучувало дали свештениците на Англиканската црква можат да благословуваат истополови парови. Во 2023 година, Малали ја опиша одлуката да се дозволи благословот како „момент на надеж за Црквата“.
Сепак, таа посочи на длабоки поделби по ова прашање. „Знам дека она што го предложивме како пат напред не е ни приближно доволно далеку за многумина, но е премногу далеку за другите“, рече таа. Еден од нејзините предизвици како надбискуп ќе биде да ги избалансира овие разлики, според Би-Би-Си.
Велика Британија денес ја именува Малали за нов надбискуп на Кантербери, што е прв пат во 1.400 години жена да стане поглавар на Англиканската црква.
Реформите воведени пред 11 години овозможија жена да ја држи оваа функција, а со нејзиното назначување за 106-ти надбискуп на Кантербери, Малали го презема кормилото на една од последните области од британскиот јавен живот што ја водат мажи.
Законот бара од надбискупите на Кентербери да се пензионираат на 70 години, што може да биде една од причините зошто некои не ја сметаа Малали за фаворит на изборите, заклучи Би-Би-Си.
© Vecer.mk, правата за текстот се на редакцијата
