Малите промени во исхраната можат да ги активираат хормоните за контрола на апетитот и губење на тежината без да трошите пари на лекови.
Ако не можете или не сакате да набавите Оземпик или слични лекови за слабеење, а сакате да изгубите килограми, еден доктор споделува осум едноставни совети кои можат да го „имитираат“ ефектот на лековите GLP-1, сосема природно и бесплатно.
Д-р Марија Скурбутакос, предавач на Одделот за семејна и општа медицина на Универзитетот во Торонто и доктор по исхрана, неодамна напиша статија за порталот The Conversation објаснувајќи како одредени диети можат да го стимулираат природното лачење на хормонот GLP-1 (кој го регулира шеќерот во крвта и ситоста), и со тоа да го поттикнат губењето на тежината.
Иако природно е потребно подолго време за да се видат резултати, докторот истакнува дека ваквите промени можат да го намалат ризикот од срцеви заболувања за дури 10% повеќе од лекови како оземпик. Плус, овие навики можат да ви помогнат да одржувате здрава тежина долгорочно.
Еве осум начини како можете да го забрзате губењето на тежината - денес:
1. Јадете заситувачки појадок
Студија од 2009 година покажа дека телото реагира побрзо на храна наутро отколку попладне. Појадокот стимулира побрзо лачење на хормонот GLP-1, што дава чувство на ситост.
Затоа - никогаш не го прескокнувајте појадокот!
2. Ручекот треба да биде помал, а вечерата најмала
Распределбата на калориите во текот на денот игра голема улога. Студија од 2013 година покажа дека жените кои јаделе 700 калории за појадок, 500 за ручек и 200 за вечера изгубиле повеќе тежина и имале помал обем на половината од оние кои ја направиле вечерата нивен најголем оброк.
3. Додадете влакна во секој оброк
Влакната се број еден кога станува збор за природно зголемување на хормонот GLP-1. Дури и без ограничување на калориите, исхраната богата со растителни влакна придонесува за губење на тежината.
Храна богата со растителни влакна:
Зеленчук: брокула, моркови, спанаќ, артичоки, сладок компир (со кора)
Овошје: малини, круши и јаболка (со кора), банани, портокали, авокадо
Цели зрна: овесна каша, киноа, кафеав ориз, јачмен, леб од цело зрно
Мешунки: леќа, црн грав, наут, зелен грав
Јаткасти плодови и семки: чиа, лен, бадеми, ф'стаци, сончоглед
Препорачан дневен внес на растителни влакна: 25 g за жени, 34 g за мажи.
4. Додадете незаситени масти
Покрај растителните влакна, важни се и мононезаситените масти (т.н. MUFA). Тие помагаат во регулирањето на холестеролот, намалувањето на воспалението и зголемувањето на лачењето на GLP-1 хормоните.
Одлични извори се: маслиново масло, авокадо, бадеми, лешници, семки од тиква, маслинки, путер од кикирики.
Се препорачува 15–20% од дневниот внес на калории да доаѓа од MUFA масти.
5. Ужина со ф'стаци
Ф'стаците се богати со растителни влакна и здрави масти. Студија од 2014 година покажа дека тие природно го зголемуваат нивото на хормонот GLP-1. Дополнително, тие можат да помогнат во заштитата на нашиот вид од сина светлина како што старееме.
6. Јадете по ред: прво протеини, потоа зеленчук, потоа јаглехидрати
Студиите покажуваат дека јадењето протеини пред јаглехидрати го зголемува нивото на GLP-1. Значи, следниот пат кога ќе јадете - прво месо, потоа зеленчук, потоа тестенини или леб.
7. Изберете цврста храна наместо кашеста или течна
Дури и самото џвакање храна поттикнува подобар хормонален одговор. Студија од 2024 година покажа дека GLP-1 се зголемува кога јадеме цврст зеленчук, за разлика од пире.
Значи - помалку смутија, повеќе салати.
8. Јадете бавно
Бавното јадење му овозможува на телото да го препознае чувството на ситост и да го регулира лачењето на хормонот GLP-1. Кога јадеме премногу брзо, честопати јадеме повеќе отколку што ни треба, бидејќи чувството на ситост доаѓа доцна.
Продолжете го времетраењето на оброкот и ќе се чувствувате сити со помалку храна.
Со вклучување на овие осум навики во вашата дневна исхрана, можете природно да активирате хормони кои го поддржуваат губењето на тежината - без лекови, без стрес и без трошоци, пишува Best Life.
© Vecer.mk, правата за текстот се на редакцијата
