По големата воена парада во Пекинг, рускиот претседател Владимир Путин и севернокорејскиот лидер Ким Џонг Ун одржаа два и пол часа разговор. Но, она што се случи по средбата привлече особено внимание од руските медиуми.
Според нивните извештаи, севернокорејскиот персонал веднаш и темелно ги отстранил сите траги од присуството на Ким во просторијата. Ја однеле чашата од која пиел, го избришале столот и го исчистиле целиот мебел што го допрел.
Видеата од ова веќе кружат на социјалните мрежи, предизвикувајќи дискусии за строго контролираниот култ на личноста што го следи севернокорејскиот лидер.
Опсесивната загриженост за безбедноста на Ким Џонг Ун не е ништо ново. Познато е дека носи свој преносен тоалет кога патува за да спречи некого да го собира неговиот биолошки материјал и да ги чита неговите здравствени податоци, како што претходно објавија јужнокорејските медиуми и Вашингтон пост.
За време на самитот со Доналд Трамп во Сингапур во 2018 година, камерите на Ројтерс го снимија и неговиот асистент како го брише и проверува пенкалото пред Ким да го земе во свои раце.
Ваквите постапки укажуваат на стравувања дека дури и навидум банални предмети, како што се чаша или стол, би можеле да откријат информации што режимот се обидува строго да ги заштити, како што е ДНК-та на Ким, објавува Индекс.
За што разговарале Ким и Путин?
Средбата меѓу Путин и Ким траела околу два и пол часа и се одржала во државната резиденција.
Путин му се заблагодарил на Ким Џонг Ун за помошта што, според него, севернокорејските сили ѝ ја пружиле на руската армија во Курската област и зборувал за „заедничката борба против модерниот неонацизам“.
Ким, пак, ветил дека ќе ѝ обезбеди на Русија „сè што може“, нагласувајќи дека тоа е братска обврска.
© Vecer.mk, правата за текстот се на редакцијата
