Егина, мал остров во Саронскиот Залив, сè уште е омилена дестинација за локалните жители, додека за повеќето странски туристи останува непозната точка на мапата. Се наоѓа на само еден час возење со ферибот од Атина, и покрај близината до главниот град, ја задржал својата автентичност и ниски цени.
Повратен билет чини околу 9 евра, додека ноќевање може да се најде од само 41 евро. Во време кога многу туристички дестинации станаа недостапни за просечниот буџет, Егина останува редок достапен остров кој комбинира квалитетен одмор, добра храна и мирна атмосфера, далеку од гужвите и масовниот туризам.
Иако се смета за викенд дестинација за Атињаните, Егина е многу повеќе од тоа. Тоа е остров со богата историја и препознатлив архитектонски идентитет, кој со децении се спротивставува на брзиот туристички развој. И оваа година е на врвот на листата на локални жители кога станува збор за прифатливи и мирни дестинации, а сè повеќе привлекува туристи кои бараат автентична атмосфера.
Морето околу Егина се смета за едно од најчистите во овој дел од Грција. Островот е полн со мирни, камчести и песочни плажи, а речиси секоја од нив нуди можност да се најде агол без гужви. Најпознати се Клима (исто така позната како Клиди), која е наградена за чистотата на водата, и Сарпас, до која води потешка патека, но која ви го одзема здивот со својата убавина. За семејствата се препорачуваат Агиа Марина, најдолгата плажа на островот, како и Аигинитис и Маратонас, кои се блиску до центарот.
За оние кои сакаат дополнителен мир, островчето Мони, кое се наоѓа на само десет минути со брод од пристаништето Пердика, нуди необично искуство – елени, дивокози, пауни и верверички слободно шетаат таму, што го прави единствен во овој дел од Грција.
Остров за хедонисти
Освен плажи, Егина нуди и богата културна и историска содржина. На островот се наоѓа куќата на Никос Казанцакис, еден од најпознатите грчки писатели, каде што престојувале многу личности од светот на уметноста. Вреди да се посети и манастирот Свети Нектариј, како и средновековната населба Палијаора, старата престолнина на островот.
Храната на Егина е посебна приказна – порциите се дарежливи, цените се за сечиј буџет, а локалните специјалитети како што се ф’стаци, морска храна и традиционални пити мамат со мириси и вкусови. Иако цените се пониски отколку на повеќето грчки острови, квалитетот не страда – напротив, многумина тврдат дека една од најдобрите рибни супи во Грција се јаде на Егина.
За буџет од околу 500 евра, можно е да поминете седум дена на Егина, со превоз, сместување и сите трошоци за престој.
Егина, засега, е остров што туристите штотуку го откриваат. Грците можеби би сакале да го задржат така – но со оглед на сè што нуди, само прашање на време е кога ќе стане хит меѓу странците.
© Vecer.mk, правата за текстот се на редакцијата
