Европскиот воздушен сообраќај во наредните недели би можел да се соочи со сериозни нарушувања, па дури и со системска криза како последица на ескалацијата на конфликтот на Блискиот Исток и затворањето на стратешкиот Ормутски Теснец, анализира Си-Ен-Би-Си.
Експертите предупредуваат дека последиците од оваа тензија вклучуваат можен недостиг на авионско гориво, нагол скок на цените на билетите и стотици откажани летови токму во периодот кога започнуваат подготовките за главната летна туристичка сезона.
Според извештаите на светските економски медиуми, ситуацијата во Европа би можела да стане критична веќе во текот на следниот месец. Главниот економист во „Ристад Енерџи“, Клаудио Галимберти, посочува дека доколку не се нормализира протокот на нафта низ Ормут, веќе во мај и јуни ќе бидеме сведоци на драстично намалување на бројот на летови низ европските аеродроми. Клучниот фактор за стабилизација останува количеството енергенси што успеваат да го поминат овој тесен морски премин, кој е од витално значење за глобалниот пазар.
Кризата дополнително се продлабочи откако Иран го затвори теснецот за време на судирите со САД и Израел, со што речиси целосно е запрен извозот на нафта од Персискиот Залив. Дополнителна ескалација донесе и американската поморска блокада, воведена со цел да се ограничи иранската трговија, што предизвика моментални потреси на енергетските берзи. Со оглед на тоа што низ оваа точка во нормални услови поминува речиси една петтина од светската нафта, последиците веќе се чувствуваат низ целиот синџир на снабдување, ставајќи го во ризик меѓународниот транспорт.
© Vecer.mk, правата за текстот се на редакцијата
