Колкава е вистинската пензија во Германија по 45 години плаќање придонеси?
Новата официјална пресметка покажува дека работник со целосен стаж и просечна плата може да очекува бруто пензија малку повисока од 1.600 евра нето. Сепак, повеќето пензионери не го достигнуваат тој износ во пракса, а разликите меѓу нив се големи, особено кога се споредуваат машките и женските пензии.
Колку е пензијата по 45 години работа?
Од 1 јули 2025 година, вредноста на еден пензиски поен во Германија ќе изнесува 40,79 евра.
Лице кое работело 45 години и секоја година заработувало целосен пензиски поен, ќе добива вкупно 1.835,55 евра бруто месечно. По одбивањето на придонесите за здравствено осигурување и осигурување за долгорочна нега, остануваат околу 1.621 евра нето, а некои пензии сè уште подлежат на оданочување.
Проценките за Германија велат дека за да се избегне сиромаштијата во староста се потребни помеѓу 1.464 и 2.100 евра месечно, во зависност од регионот и трошоците за живот. Според овие податоци, излегува дека „стандардната“ германска пензија ја покрива долната граница на она што е потребно за нормален живот.
Повеќето добиваат помала пензија.
Иако износот на целосна пензија по 45 години стаж често се истакнува јавно, вистинските износи што ги добиваат пензионерите се значително помали. Според официјалните податоци од германското пензиско осигурување, во 2023 година, мажите добивале просечно 1.348 евра старосна пензија, а жените само 908 евра. Во исто време, пресметаната стандардна пензија изнесуваше 1.692 евра бруто.
Со други зборови, просечниот маж добива околу 340 евра помалку од стандардната пензија, додека кај жените разликата е дури 784 евра. Причините се бројни, од прекин на стажот, работа со скратено работно време, до подолги периоди на невработеност или грижа за деца.
Дополнителни разлики и оданочување
Разликите во пензиите се особено изразени кај мажите и жените бидејќи жените почесто имаат паузи во кариерата или работат помалку часови. Покрај тоа, ниските пензии честопати подлежат на данок во зависност од вкупниот приход на пензионерот, што дополнително го намалува износот што го имаат на располагање секој месец.
Поради сето погоре наведено, се проценува дека речиси секој седми пензионер во Германија денес живее под линијата на сиромаштија.
Официјалните податоци покажуваат дека 17 проценти од постарите лица немаат доволно приходи за да водат достоинствен живот, и покрај децениските придонеси.
© Vecer.mk, правата за текстот се на редакцијата
