Во Русија веќе е развиена вакцина против новиот сој на ебола, а во следниот период претстои нејзино тестирање, соопшти рускиот министер за здравство, Михаил Мурашко.
Говорејќи на маргините на Меѓународниот економски форум во Санкт Петербург, Мурашко појасни дека научниците од Институтот „Гамалеја“ ја искористиле претходно создадената вакцина против ебола грозница и успешно ја адаптирале на новиот сој, со што таа веќе е достапна како готов производ. Министерот подвлече дека предложената вакцина сега мора да помине низ неколку задолжителни фази на тестирање, но истовремено увери дека еболата во моментов не претставува директна закана за Русија.
Ебола треската е акутна и опасна заразна болест предизвикана од филовирус. Карактеристичните симптоми вклучуваат ненадејна треска, општа слабост, силни болки во мускулите, главоболка, болки во грлото и стомакот, како и повраќање, дијареја, осип и во потешки случаи, внатрешни и надворешни крварења.
Овој развој на настаните доаѓа откако Светската здравствена организација ја прогласи епидемијата на ебола во Демократска Република Конго и Уганда за вонредна состојба за јавното здравје од меѓународно значење. Во овие африкански земји моментално се шири сојот Бундибугио, каде бројот на сомнителни случаи веќе надмина 900, од кои досега се официјално потврдени 101 случај.
© Vecer.mk, правата за текстот се на редакцијата
