Познатите личности како Гвинет Палтроу, Ешли Греам и фудбалерот Ерлинг Халанд се фалат со нов трик против ҆рчењето – леплива лента на устата
Овој необичен метод, кој вклучува ставање леплива лента над устата за да се поттикне назалното дишење за време на спиењето, добива на популарност благодарение на тврдењата дека може да го замолчи ҆рчењето и да ја елиминира утринската сувост.
Многумина се прашуваат дали оваа едноставна, неинвазивна метода е вистински пробив за оние што ҆рчат или само уште едно краткотрајно лудило.
– Лента за уста е чин на ставање хируршка или леплива лента на устата за време на ноќниот сон. Инфлуенсерите тврдат дека овој метод го замолчува ҆рчењето и ја спречува утринската сувост на устата. Целта е да се поттикне дишењето преку нос, а не преку уста, во текот на ноќта. Дишењето преку уста за време на спиењето може да предизвика голем број проблеми, објаснува за Експрес експертот за спиење д-р Хана Пател.
Таа истакнува дека вдишувањето и издишувањето преку уста може да доведе до суви и иритирани дишни патишта, болки во грлото и иритација, како и поголем ризик од нарушувања на спиењето, вклучително и апнеја. Од друга страна, дишењето преку нос има голем број на предности.
Селотејп за подобар сон?
Нашиот нос го филтрира воздухот што го дишеме, отстранувајќи ја прашината, поленот, бактериите и опасните честички, што ја намалува иритацијата на белите дробови. Дополнително, дишењето низ носот го забавува протокот на воздух, што го смирува вашето дишење и промовира подлабок и поквалитетен сон.
„Лепењето на устата помага да се одржи оваа шема на дишење, што потенцијално води до подобри нивоа на енергија и подобар квалитет на одмор по спиење“, вели д-р Ризван Махмуд, стоматолог.
Овој тренд сè повеќе се вклопува во популарните навики насочени кон долгорочно здравје, како што се наизменичното постење и потопување во ладна вода.
Зошто познатите личности го поддржуваат овој метод?
Фудбалерот Ерлинг Халанд го вклучи лепењето на устата во својата ноќна рутина за да ги подобри своите атлетски перформанси. Актерката Гвинет Палтроу исто така го прифатила овој метод и тврди дека тоа е најдобрата алатка за велнес што ја открила.
Опасностите од „залепена уста“
Сепак, експертите предупредуваат на потенцијални ризици. Д-р Бавини Шах од LloydsPharmacy Online Doctor издаде остро предупредување за опасностите од овој метод:
– Иако дишењето низ нос додека сте будни може да ви помогне да го смирите дишењето и да ја ублажите анксиозноста, држењето на устата затворена додека спиете може да биде опасно. Ова може да доведе до отежнато дишење, нарушувања на спиењето и иритација на кожата, предупреди таа.
Д-р Махмуд се согласи и додаде дека овој метод не е погоден за секого, особено за оние со респираторни проблеми или нарушувања на спиењето, како што е опструктивна ноќна апнеја.
– Пред да ја испробате оваа техника, клучно е да се консултирате со лекар или специјалист за спиење – заклучил д-р Махмуд, како што пренесува Net.hr.
© Vecer.mk, правата за текстот се на редакцијата
