Летната сезона штотуку започна, а над европските плажи веќе се надвиснува нова закана. Здравствените власти предупредуваат на ширење на бактеријата Vibrio, позната во јавноста како „бактеријата што јаде месо“, поради што веќе се затворени неколку плажи во Шпанија, пренесува „Еуроњуз“.
Експертите алармираат дека сè повисоките температури на морето создаваат идеални услови за размножување на опасната бактерија, која природно живее во морските и крајбрежните води. Најголем ризик постои во плитките води и во областите каде реките се влеваат во морето.
Инфекцијата може да се пренесе преку контакт на отворени рани со морска вода или со консумирање сурови морски плодови. Во потешки случаи, бактеријата може да предизвика сериозни оштетувања на ткивото, сепса, па дури и потреба од ампутација на екстремитети.
Од Европскиот центар за превенција и контрола на болести предупредуваат дека ризикот дополнително расте за време на топлотни бранови, какви што веќе ја зафаќаат Европа. Според научниците, Медитеранот е меѓу најранливите региони во светот на последиците од климатските промени и забрзаното затоплување на морето.
Покрај заканата за здравјето, ширењето на бактеријата претставува сериозен удар и за туризмот. Затворањето плажи и здравствените предупредувања во екот на сезоната можат да предизвикаат големи економски загуби за туристичките центри кои зависат од летните посетители.
Експертите предупредуваат дека ова повеќе не е закана од иднината, туку проблем со кој Европа се соочува веќе денес.
© Vecer.mk, правата за текстот се на редакцијата
