Во Непал е започнат попис на мајмуните за да се спречат растечките проблеми со животните во непалските села, каде што тие уништуваат посеви и се судираат со луѓето.
Првиот национален попис на мајмуни има за цел да пронајде начини за намалување на конфликтните интеракции меѓу луѓето и овие животни и да помогне во развојот на планови за зачувување и адаптација за овој вид, објавува непалскиот дневен весник „Катманду пост“.
Според експертите, проблемите поврзани со мајмуните, особено уништувањето на посевите и конфликтите меѓу луѓето и овие животни, станаа прашање од национално значење.
Податоците од пописот ќе помогнат во развојот на решенија прилагодени на популацијата на мајмуни, но исто така ќе обезбедат поддршка за погодените земјоделци.
Според Хари Прасад Шарма, вонреден професор на Централниот оддел за зоологија, Универзитет Трибхуван (TU), пописот на мајмуните досега е завршен во 19 рурални општини и во 13 области.
Пописот на мајмуните, кој започна на 28 март, се очекува да биде завршен до средината на јуни.
© Vecer.mk, правата за текстот се на редакцијата
