Членот на Претседателството на Алијансата за Албанците и политички советник на поранешниот министер за здравство, Сабри Азири, изјави дека дел од Алијансата одлучила да не го следи актуелниот лидер на едното крило, Арбен Таравари, и да не ја напушти Владата. Во интервју за „Kosova Online“, Азири вели дека со останувањето во коалицијата ВЛЕН, пратениците на Алијансата за Албанците сакаат да ги исполнат своите обврски кон граѓаните.
„Мислам дека моменталната атмосфера во Алијансата за Албанците се движи во позитивна насока, затоа што ние сме луѓето кои јавно ги претставивме и изразивме нашите ставови за креирање политики. Не сакаме да бидеме тимот што полека, но сигурно, ќе премине на страната на ДУИ. Нашата реторика, нашиот наратив за време на изборите беше дека сакаме да донесеме промена и да направиме разлика. Но кога нема транспарентност, тогаш самосвеста на луѓето и на политичката група излегува на површина. Јас лично и моите сопартијци сме гласот што јавно го кажа тоа и го вклучи алармот. Сакаме да продолжиме по нашиот пат и она што граѓаните ни го дадоа како легитимитет – да продолжиме и да функционираме во рамките на коалицијата ВЛЕН со цел да ги реализираме обврските што им ги дадовме на граѓаните,“ истакна Азири.
Тој додава дека не добиле конкретен одговор зошто Таравари се повлекува од Владата.
„Помина малку време меѓу изјавите дека Владата функционира одлично и потоа дека не функционира. Времето ќе покаже, но ние не се согласуваме со таа политика на повлекување од власта. Имаме луѓе кои не се согласија со политиките што 22 години беа создадени од претходните партии, и тие луѓе и тие функционери одлучија да бидат во опозиција 22 години. Сега истите тие луѓе ги именувавме на одредени позиции, некои се веќе вработени и сега ако се повлечеме, тоа значи дека сме ги предале сите со кои заедно ја водевме оваа битка,“ рече Азири.
Тој не смета дека имало конкретен момент на конфликт во партијата и оценува дека сè се случило ненадејно и брзо.
„Нашите гласачи се луѓе кои не се согласуваат со претходно прифатените политики во нашата земја и токму тие не охрабруваат да продолжиме по овој пат. Мислам дека Владата има силно мнозинство и не мислам дека ова ќе влијае негативно на нејзината стабилност,“ порача Азири.
© Vecer.mk, правата за текстот се на редакцијата
