Пратеникот од ВМРО-ДПМНЕ Миле Лефков денеска објави фотографија на која тврди дека се гледа шоферот А.Н. како дел од најтесниот круг на Зоран Заев.
– Заев лаже кога вели дека А.Н. не му бил шофер. Од оваа фотографија се гледа дека токму потпалувачот на пожари е дел од кругот на Заев кога тој ги предаваше „бомбите“ во СЈО и кога по кажувања на нему блиски се опкружил само со проверени луѓе. Ако А.Н. бил проверен човек на Заев, и лице од највисока доверба не може, а да не прашаме по чија насока дејствувал сега кога ги палел пожарите? Шоферот на Заев е жив фатен, а со тоа и СДС. Има ли некој во државата кој верува дека шоферот на Заев постапувал на своја рака? – рече Лефков.
Пратеникот го повика лидерот на СДСМ Венко Филипче да се огради од Заев и да го осуди палењето на пожарите кои ги прават лица блиски до поранешниот лидер и премиер.
– Доколку Венко Филипче продолжи да молчи, само ќе потврди во целост, дека тој е едно со Заев, дека ја спроведува неговата политика и неговата агенда – додаде Лефков.
Заев вчера негираше дека приведениот за подметнување пожар не бил негов личен возач, туку дека бил општински возач во Општина Струмица.
© Vecer.mk, правата за текстот се на редакцијата
