Сериозни пропусти во работењето на Комисијата за заштита на конкуренција откри државниот завод за ревизија. Во извештајот за 2024 година, ревизорите изразија мислење со резерва и посочија низа неправилности, од спорни постапки при јавните набавки и нецелосна евиденција за иречените глоби, до неосигурување на државен имот, што преставува прекршување на законските обврски.
Според ревизорските наоди, институцијата со години назадот не воспоставила единствен систем за следење на предметите по кои се изрекуваат парични казни, што отвора сериозен ризик од нивно застарување.
Дополнително, државните ревизори утврдија дека КЗК воопшто ги нема осигурено своите деловни простории, опремата и благајната, со што директно го прекршила Законот за користење и располагање со стварите во државна сопственост.
Од Државниот завод за ревизија прецизно ги дефинираат констатираните неправилности кои влијаеле врз конечната оценка:
„Со извршената ревизија на финансиските извештаи и ревизија на усогласеност кај Комисија за заштита на конкуренцијата, сметка на основен буџет (637) за 2024 година, констатирани се следниве состојби: материјалната и сметководствената евиденција не се усогласени поради отсуство на вредносни показатели во пописните листи, Комисијата нема преземено мерки за заштита на имотот преку осигурување, отсуство на единствена евиденција на предмети за кои се изречени глоби, слабости во содржината на тендерска документација и техничка спецификација во дел од постапките за јавни набавки.“ - се вели во извештајот на ДЗР
Набавувале мобилни со нацртани спецификации и такси-услуги без јасни критериуми
Под детална лупа на ревизорите беа сите четири постапки за јавни набавки спроведени во текот на 2024 година во вкупна вредност од 1,18 милиони денари. Кај половина од нив се констатирани флагрантни кршења на Законот за јавни набавки со кои се ограничувала конкуренцијата на пазарот.
При набавката на три мобилни телефони, КЗК напишала спецификација која директно асоцирала на еден конкретен производител, додека кај набавката за такси-превоз не бил опишан начинот на бодување.
Во извештајот за овие сомнителни тендери конкретно се наведува:
„За набавката на мобилни телефони договорниот орган ја дефинирал техничката спецификација така што дадените карактеристики упатуваат на конкретен производител и производи, што не е во согласност со член 82 став 8 и 9 од ЗЈН… Во тендерската документација и огласот за набавка на услуги за такси превоз, како критериум за избор на најповолен понудувач е предвидено дека, договорниот орган ќе користи економски најповолна понуда врз основа на најдобриот однос помеѓу цената и квалитетот… но не е опишан начинот на доделување на бодови.“ - се вели во извештајот на ДЗР
Изгубени листи за присуство на работа и недостаток на еден член:
Посебен куриозитет во извештајот претставува делот со евиденцијата на вработените, каде од институцијата им соопштиле на ревизорите дека не можат да ги пронајдат дневните листи за присуство за 2024 година бидејќи „поминал подолг период“. Во доставените листи за 2025 година, пак, воопшто го немало присуството на самите членови на Комисијата за кои се исплаќаат државни плати.
Истовремено, ревизорите истакнуваат дека во текот на цела 2024 година Комисијата функционирала со еден член помалку, со оглед на тоа што еден од членовите бил избран за претседател, а Собранието со месеци не именувало нов на неговото место.
Во однос на изгубената документација за работните часови, ДЗР подвлекува:
„Евидентните дневни листи кои биле водени во 2024 година не ни беа доставени на увид, со образложение дека е поминат подолг период и не можат да ги најдат. На увид е доставена евиденција за три месеци по избор на ревизијата, за 2025 година, во која не е евидентирано присуство на членовите на Комисијата.“ - се вели во извештајот на ДЗР
По укажувањата на ДЗР за време на самата ревизија, раководството на КЗК прифатило сметководствени корекции со кои ги зголемило активата и пасивата за 13,1 милиони денари со соодветно запишување на зградата во која е сместена Комисијата.
© Vecer.mk, правата за текстот се на редакцијата
