Иранските танкери за нафта излегоа од зоната во Персискиот Залив што беше блокирана од американската воена морнарица, што претставува прв извоз на сурова нафта од оваа земја во последните два месеци, објави специјализираната интернет-страница „ТанкерТракерс“ (TankerTrackers), која ги следи пратките и складирањето нафта на глобално ниво.
„Најмалку два супертанкери на Националната иранска танкерска компанија (NITC) од типот VLCC, со имиња 'Diona' (9569695) и 'Hero 2' (9362073), излегоа од периметарот на блокадата на американската морнарица, пренесувајќи вкупно 3,8 милиони барели иранска сурова нафта“, се наведува во соопштението што „ТанкерТракерс“ го објави на платформата Икс (X), повикувајќи се на податоци од дигиталното следење кои биле потврдени и со сателитски снимки. Од таму додаваат дека и трет танкер на истата компанија ја поминал линијата на блокадата, носејќи дополнителни еден милион барели нафта.
Ова раздвижување доаѓа непосредно по изјавата на американскиот претседател Доналд Трамп, дадена на маргините на самитот на Г7 во францускиот град Евијан. Трамп најави дека Ормускиот Мореуз ќе биде „слободен и целосно отворен до петок“, нагласувајќи дека по постигнувањето на меморандумот за разбирање меѓу САД и Иран, „бродовите веќе почнаа да се движат“.
Ормускиот Мореуз беше во целосна блокада од почетокот на март. По серијата воени напади од страна на САД и Израел, иранските сили го спречија преминот на сите бродови за кои сметаа дека доаѓаат од непријателски земји. Како одговор на ова, американската морнарица воведе контраблокада на мореузот за сите садови кои доаѓаат од или пловат кон иранските пристаништа.
© Vecer.mk, правата за текстот се на редакцијата
