Оваа мерка е одговор на итната потреба за растоварување на казнените институции кои достигнаа критично ниво на искористеност.
Затворениците кои отслужуваат казни над пет години ќе имаат право на условно ослободување откако ќе отслужат повеќе од 40 отсто од казната, што е за 10 отсто помалку од вообичаените 50 отсто. Од оваа мерка се изземени затворениците осудени за сериозно насилство, кривични дела против сексуалната слобода и тероризам.
Ова е втор круг на предвремено ослободување откако министрите извршиле ревизија на казните во септември, што може да доведе до создавање нови форми на казнување надвор од затворот. Целта е да се намали пренатрупаноста во затворите и да се создадат услови судиите да изрекуваат казни како домашен притвор.
Министерката за правда Шабана Махмуд нагласи дека целта е да се осигура дека ваквите вонредни мерки повеќе нема да бидат потребни во иднина, со што ќе се избегнат слични проблеми со пренатрупаноста.
Ослободувањето на затворениците е дел од вонредниот план што го објавија министрите по општите избори, кога имаше бројни предупредувања за пренатрупаност на затворите. Планот предвидува да се ослободат околу 5.500 места низ Англија и Велс, при што многу од затворениците ќе бидат ослободени од отворените затвори, што значи дека веќе биле во процес на рехабилитација.
Бројот на затвореници рапидно растел, околу 4500 годишно, што е побрзо отколку што претходната британска влада можела да изгради нови ќелии. Иако министерот за правда најави изградба на 14.000 нови места, тоа ветување не се исполни.
Министерот за правда изјави: „Имаме можност да редизајнираме како може да изгледа казнувањето надвор од ќелиите“, нагласувајќи ја потребата од нови пристапи за казнување и реформа на правосудниот систем за да се избегне пренатрупаност во затворите.
© Vecer.mk, правата за текстот се на редакцијата
