Во Германија, денес стапи на сила закон кој дозволува автомобилите да се контролираат од далечина, односно не е потребно возачот да биде во кабината на автомобилот, туку да може да го контролира автомобилот од далечина, на пример од контролниот центар.
„Со оваа регулатива, создаваме јасна законска рамка за тестирање на возила со далечинско управување во јавен патен сообраќај“, изјави државниот секретар за транспорт Кристијан Хирте, додека Министерството за транспорт објави дека гледаат специфични примени во областа на „споделување на возење“, објавува „Шпигел“.
Како што е наведено во соопштението, новата мерка треба да го подобри автономното возење, а самата цел е да се промовира „споделување на автомобили“ и робо-такси услугите.
Возилата со далечинско управување би можеле да помогнат и во поефикасно користење на ресурсите за испорака во иднина.
Досега, во Германија немаше законска рамка за возила со далечинско управување, а новата мерка предвидува дека секој што сака далечински да контролира возило мора да има најмалку 21 година, да има возачка дозвола најмалку три години и да заврши специјализирана обука.
Техничката обука вклучува техничко знаење, како и обука за безбедност што опфаќа видеодисплеи, сензори и процедури за итни случаи.
© Vecer.mk, правата за текстот се на редакцијата
