За слабостите во системот укажувам уште кога раководев со ЦУК

По објавата на извештајот од државна ревизија за слабостите на системот за управување со кризи, заштита и спасување се произнесе и првиот човек на дирекцијата за заштита и спасување Стојанче Ангелов кој вели дека и тој ги посочувал овие факти уште кога раководел со Центарот за управување со кризи.

Соопштението од Ангелов во целост:

Слабостите на Системот за управување со кризи, заштита и спасување на кои укажува ДЗР во суштина се' слабости на кои укажував како директор на ЦУК но и сега како директор на ДЗС.Дел од овие слабости значително се намалени со минатогодишните изменувања и дополнувања на Законот за управување со кризи а дел со изменувањата и дополнувањата на Законот за заштита и спасување од јуни оваа година.Во делот на ресурси состојбата значително е подобрена. Ова лето после повеќе години ер тракторите беа благовремено сервисирани и ставени во функција пред стартот на сезоната на пожари на отворен простор. Бројот на противпожарни возила последните неколку години постепено се зголемува вклучувајки ги и специјалните возила на ДЗС (23 пинцгауери, 15 БТР и 5 хермелини, пренаменети во противпожарни возила).Во делот на унифицирано командување со силите за заштита и спасување е направен значаен исчекор со додавање на нов став 5 во член 108:„Во акции кои бараат итна интервенција републичките сили за заштита и спасување се ангажираат со одлука на директорот на Дирекцијата." Со оваа измена се прескокнуваат сите претходни бирократски усложнувања и успорувања во итни ситуации бидејки директорот на ДЗС е овластен да нареди ангажман на било која единица или дел од единица од Силите за заштита и спасување кои, наједноставно кажано, се составени од сите пожарникари во државата, сите вработени лица во ДЗС или ангажирани со договор на дело во ДЗС (како што се посадите на специјалните возила) и припадниците на Тимовите за брз одговор на ДЗС.Ова лето ангажманот на доброволни пожарникари преку Тимовите за брз одговор на ДЗС е неспоредливо повисок во однос на минатите години со што беше избегната потребата од подршка на операциите на гаснење на комплексни пожари со припадници на Полицијата и Армијата.Исто така, ова лето немаше потреба од барање на меѓународна помош. Напротив, за прв пат од постоењето, ДЗС во Европскиот механизам за заштита и спасување декларираше два ер трактора за помош на други земји.И покрај постоечките слабости и недостатоци, ова лето Македонија најуспешно досега се справи со пожарите на отворен простор.Реформите на Системот за управување со кризи, заштита и спасување продолжуваат понатаму во насока на создавање на една единствена институција која ќе ги обедини функциите на ЦУК и ДЗС.