Виенскиот економист, консултант и претседател на Австрискиот комитет за проширување на НАТО, Гинтер Фелингер-Јан, ја објави својата визија за иднината на Македонија. Во објава на платформата Х, тој предложи воведување федерален систем по австриски модел, со осум силни покраини наместо сегашната силна централизација во Скопје.
Според предлогот, секоја покраина би имала сопствен покраински парламент (Landtag), регионална влада и гувернер, со јасно дефинирани надлежности во областите на образованието, културата, регионалниот развој, инфраструктурата и локалната економска политика. Општините би останале силни, додека федералната влада би се фокусирала на надворешната политика, одбраната, макроекономската политика и националните стандарди.
Предложените осум покраини се: Скопје, Полог, Североисток, Запад, Вардар, Исток, Југозапад/Охрид и Пелагонија/Битола.
Фелингер-Јан ја нагласи европската перспектива како клучен дел од својата визија. Тој се залага за членство на Македонија во Европската Унија, воведување на еврото, влез во Шенген-зоната и членство во ОЕЦД – сè до 2029 година.
„Австрија покажува како релативно мала европска земја може да комбинира заедничка држава со силни регионални идентитети и значајна регионална власт. Мојот предлог е да се прилагоди тој федерален принцип на географијата, заедниците и уставните традиции на Македонија.“ – напиша Фелингер-Јан.
Тој ја заокружи својата порака со зборовите:
„8 покраини. Една Македонија. Една европска иднина.“
Предлогот е проследен со визуелна презентација на која се прикажани осумте покраини, заедно со целите за 2029 година: членство во ЕУ, евро, Шенген, ОЕЦД, федерална реформа и стабилност, раст и европски просперитет. Фелингер-Јан, кој се најавува и како кандидат за претседател на Австрија во 2028 година, ја презентира оваа идеја како начин Македонија да ја зајакне својата европска иднина преку децентрализација и силни регионални идентитети.
MY AUSTRIAN-STYLE OFFER FOR A FEDERAL MACEDONIA 🇲🇰🇦🇹🇪🇺 I propose a federal Macedonia built on the Austrian model: 8 strong Länder instead of excessive centralisation in Skopje. Each region should have its own Landtag, regional government and governor, with clearly defined responsibilities for education, culture, regional development, infrastructure and local economic policy. Municipalities should remain strong, while the federal government concentrates on foreign policy, defence, macroeconomic policy and nationwide standards. My proposed 8 Länder: Skopje • Polog • Northeast • Western • Vardar • Eastern • Southwest/Ohrid • Pelagonia/Bitola The European objective I advocate for 2029: 🇪🇺 EU membership 💶 Euro 🇪🇺 Schengen 🌍 OECD membership Austria shows how a relatively small European country can combine a common state with strong regional identities and substantial regional government. My proposal is to adapt that federal principle to Macedonia’s own geography, communities and constitutional traditions. 8 Länder. One Macedonia. One European future. Günther Fehlinger-Jahn https://t.co/4HINhwoD2M | https://t.co/TTmBf6L9w7 | @GunterFehlinger
— Gunther Fehlinger-Jahn (@GunterFehlinger) September 30, 2026
© Vecer.mk, правата за текстот се на редакцијата
