Големата промена во надворешната политика на американскиот претседател Доналд Трамп ја принудува Европа итно да ги разгледа одбранбените алтернативи. Меѓу другото, тоа ги принудува Германците да размислуваат за развој на нуклеарно оружје, нешто што САД долго сакаа да го избегнат, пишува конзервативниот The Wall Street Journal.
Најверојатниот иден германски канцелар, лидерот на демохристијаните Фридрих Мерц, рече дека Германија треба да ги води разговорите за проширување на францускиот и британскиот нуклеарен штит во цела Европа.
Во интервју за Frankfurter Allgemeine Sonntagszeitung, на прашањето дали Германија треба да има свој нуклеарен арсенал, Мерц рече дека „денес нема потреба од тоа“.
Ова значи дека тој не ја отфрли идејата, посочува WSJ.
Така, Доналд Трамп успеа да го скрши долгогодишното табу со тоа што објави дека повеќе нема да испраќа воена и разузнавачка помош во Украина и со неговиот изненадувачки пресврт кон рускиот претседател Владимир Путин.
Безбедносен јаз
За разлика од Франција и Велика Британија, Германија се потпираше на американските воени бази на нејзина територија.
Германија е потписник на Договорот за неширење на нуклеарно оружје, кој и забранува да развива нуклеарно оружје и ги спречува другите потписници да и помогнат во тоа.
Таа, исто така, се откажа од нуклеарното оружје со договор што го отвори патот за повторно обединување.
Американското тактичко нуклеарно оружје сега се складира во воздухопловната база Бухел во западна Германија, подготвено да се користи од германското воено воздухопловство доколку американскиот претседател издаде таква наредба, пишува WSJ.
Вашингтон не објави дека сака да ги повлече трупите од Европа, но Трамп се обиде да го стори тоа во својот прв мандат. По надворешнополитичкиот пресврт на Трамп, никаде во Европа не е поочигледно чувството на напуштеност како во Германија, наведува весникот.
За да ја пополни безбедносната празнина, Германија има четири опции, вели аналитичарот Кристијан Молинг од фондацијата Бертелсман:
„Американците продолжуваат да го одржуваат своето нуклеарно одвраќање на европско тло;
Европејците го преземаат американскиот арсенал на европско тло;
Некоја мешавина од тие две варијанти; и
четврто решение, Европејците да се обидат да го заменат американското повлекување со конвенционални сили. Сето тоа е ризично“, вели Молинг.
Понудата на Макрон
Мерц оваа недела се согласи со идните коалициски партнери да се откаже од забраната за задолжување за воени цели.
Германскиот конзервативен пратеник Томас Силберхорн вели дека Русија претходно се закани со нуклеарна ескалација.
„Ние Европејците мора сериозно да ја сфатиме оваа нуклеарна закана и да се соочиме со нуклеарно одвраќање. Досега тоа го обезбедуваа САД, а сега разговараме дали можеме да го организираме ова на европско ниво, со Франција и Велика Британија.“
Францускиот претседател Емануел Макрон во телевизиско обраќање оваа недела објави дека ќе започне стратешка дискусија за проширување на францускиот нуклеарен штит на европските сојузници.
„Макрон и претходно нудел такви разговори, но Германците го игнорирале. Тој повтори дека Франција е подготвена да го искористи своето нуклеарно оружје за да ги заштити своите европски партнери.
Франција и Обединетото Кралство веќе имаат минимално веродостојно нуклеарно одвраќање, но тие отсекогаш работеле со американска поддршка во позадина“, вели Александар Болфрас од Меѓународниот институт за стратешки студии (IISS).
Политикологот Максимилијан Терхале минатата година ја изнесе идејата дека Германија треба да им понуди на САД купување на околу 1.000 моментално неактивни стратешки нуклеарни боеви глави.
СТРАВ ОД РУСИЈА
И Полска сака атомска бомба. Доналд Туск: Би биле побезбедни
Полска исто така би сакала сопствено нуклеарно оружје, изјави премиерот Доналд Туск.
„Денес е јасно дека би биле побезбедни кога би имале сопствен нуклеарен арсенал, тоа е непобитно. Во секој случај, патот до тоа би бил многу долг и би требало да има консензус“, рече Туск.
Полска планира да потроши 4,7 отсто од својот БДП за одбрана оваа година, што е најголем удел во НАТО, потсетува британски The Guardian.
Туск им рече на пратениците дека воените трошоци треба да се зголемат на пет отсто од БДП. Доналд Туск пред Сејмот најави дека сака голема и силна војска. Тој во своето обраќање пред парламентот рече дека украинската армија има 800.000 војници, а Русија околу 1,3 милиони. Затоа Туск сака да ја зголеми армијата на 500.000 војници, вклучително и резервисти, наместо сегашните 200.000.
Тој вети дека во наредните месеци ќе ги соопшти деталите за новиот план.
„Ќе се обидеме да подготвиме модел до крајот на оваа година, така што секој возрасен маж во Полска ќе биде обучен во случај на војна, за оваа резерва да биде адекватна на потенцијалните закани“, рече тој во Сејмот.
Покрај организирањето на резерва, резервните војници би биле подложени на интензивна обука за да бидат високо функционални доколку е потребно. Туск рече дека жените можат да поминат и воена обука, но „војната сè уште е во голема мера домен на мажите“.
Доналд Туск рече дека тие внимателно го разгледуваат францускиот предлог за вклучување на Европа под нејзиниот нуклеарен чадор. Од големо значење за нив е прашањето што значи тоа во однос на авторитетот. Тој предупреди дека Украина била нападната откако се ослободила од сопствениот нуклеарен арсенал.
Полска ги зголеми воените трошоци по руската инвазија на Украина. Потпиша договори со САД за купување оружје во вредност од околу 20 милијарди долари: купува 250 борбени тенкови М1А2 Абрамс, 32 авиони Ф-35, 96 хеликоптери Апачи, ракети Џавелин и артилериски ракетни системи. Од Јужна Кореја купува тенкови К2 и лесни борбени авиони ФА-50.
Извор: Јутарњи
© Vecer.mk, правата за текстот се на редакцијата
